په افغانستان کې د امریکایي اشغال د خاتمې درې کاله پوره شول.
له ننه درې کاله وړاندې د اسد ۲۴مه هغه ورځ وه، چې اسلامي امارت په کې له خپلې ټولې خاورې د امریکا او ناټو لمن ورټوله او فتحه یې نصیب شوه.تر دغې فتحې وروسته افغانستان له سیاسي، امنیتي، اقتصادي، ټولنیزو او له نورو بېلابېلو اړخونو یوه نوې دوره پیل کړه.د تېرو دریو کالو پرمهال اسلامي امارت د یوه ثابت او متحد قیادت په درلودلو سره ټول هېواد له بشپړ امنیت او ثبات څخه برخمن کړ. بېلابېلې ډلې او مخالف عناصر یې محوه کړل او د یو موټي افغانستان لپاره یې ستر ګامونه واخیستل.د همدغو ګامونو په پایله کې د هېواد سیاسي او امنیتي وضعیت باثباته شو.د اسلامي امارت سیاسي بصیرت او امنیتي ثبات لپاره نړۍ ګوته په غاښ شوه. د ملي یووالي په راوستو کې خو دغه هڅې بیخي بې سارې وې. نړیوالو سره ډیپلوماټیکې اړیکې ورځ تر بلې د پرمختګ پر لور روانې شوې.اسلامي امارت هڅه وکړه، چې د سیمې او نړۍ له هېوادونو سره منظمې سیاسي اړیکې ټینګې کړي. د دې په ترڅ کې یې د چین، روسیې، هند، ایران، قطر، پاکستان او ګڼو نورو هېوادونو سره ډیپلوماټیکې اړیکې پراخې کړې او په دې برخه کې یې د نړیوال مشروعیت ترلاسه کولو په موخه خپلې هڅې جاري وساتلې.دغه راز یې په یو شمېر نړیوالو غونډو او کنفرانسونو کې ګډون وکړ، چې د نړۍ له هېوادونو سره د افغانستان سیاسي او ډیپلوماټیکو اړیکو ته پراختیا ورکړي. اسلامي امارت د نړیوالو تړونونو په برخه کې خپل دریځونه نړیوالو ته وړاندې کړل او اوس هم په دې هڅه بوخت دي، چې نړیوالو ته د شویو منفي تبلیغاتو پر خلاف خپل بې ضرره سیاسي دریځ روښانه کړي.دې برخه کې تر ډېره بریده اسلامي هېوادونو قناعت کړی، چې له همدې امله یې اسلامي امارت سره مخامخ او یا د پردې تر شاه ګډې همکارۍ پیل کړي دي.له نورې نړۍ سره هم په دغه درې کلنه دوره کې مهم سیاسي پرمختګونه شوي او لا هم د نړیوال مشروعیت په برخه کې د پام وړ هڅې روانې دي. اسلامي امارت د امنیت په برخه کې هم سترې بریاوې ترلاسه کړې.د امنیت په فضا کې د اسلامي امارت دا درې کاله مزل کول او د خلکو ژوند لپاره خوندي چاپېریال رامنځته کول د ستاینې وړ دي. د دیني تعلیماتو خپرول او د اسلامي شریعت تطبیق هغه څه دي، چې په دې درې کلن مزل کې ډېر پرمختګونه په کې لیدل شوي. بل لور د درې کالو په ترڅ کې د اقتصادي پرمختګ لپاره ګړندۍ هڅې هم د پام وړ دي.د کانونو منظم استخراج، د سوداګریزو لارو پراختیا او د کرنې په برخو کې د نوښتونو پرمټ د هېواد اقتصاد د پیاوړتیا پر لور روان شو. لوګر کې د مس عینک کان پروژه، کاسا زر پروژه، قوشتېپې کانال، د شبرغان د ګازو پروژه، شمالي ولایتونو کې د امو سیند د تیلو د استخراج چارې، د افغانستان او چین ترمنځ د واخان دهلیز، هرات کې د سلما او هلمند کې د کجکي بند دوهم فاز چارو ترڅنګ داسې نورې پروژې چې یو شمېر یې په بشپړېدو دي او ځینې نور یې تر کار لاندې دي.دغه راز د ټاپي پروژې په تړاو هم هڅې ګړندۍ شوې او ښکېلو هېوادونو ته د افغانستان په تړاو بشپړ ډاډ او اطمنان ورکړل شو. د دې سربېره نورو برخو کې هم د هېواد اقتصادي وضعیت د پام وړ ښه شو او د لا ښه والي او پرمختګ لپاره یې هڅې چټکې شوې.دغه راز په شوي درې کلن مزل کې د بیارغونې او پرمختګ لپاره هم ځانګړې هڅې وشوې.د بېلابېلو ټولنیزو پروژو په مرسته د خلکو ژوند مثبت لور ته بدل شو. د بې وزله خلکو ملاتړ لپاره بېلابېلې پروژې پلې شوې، د ځوانانو لپاره کاري فرصتونه ډېر شول او د روزنیزو پروګرامونو پرمټ د ځوانانو فکري روزنې لپاره کار وشو، چې دا د اسلامي امارت له مهمو لاسته راوړنو څخه ده.په بېلابېلو ولایاتو کې رغنیزې چارې پیل شوې. د سړکونو، پلونو او بندونو جوړول او د کلیو او ښارونو بیارغونه هغه مهم کارونه وو، چې اسلامي امارت په تېر درې کلن مزل کې ترسره کړل. د دې رغنیزو پروژو له لارې د خلکو ژوند اسان او د هېواد پرمختیایي بهیر لا نور ګړندی شو.د فساد مخنیوی او د اسلامي اصولو په رڼا کې د حکومتدارۍ تطبیق په دې برخه کې مهم رول لوبولی دی.اسلامي امارت د خپلو دغو هڅو او لاسته راوړنو له امله په ملي او نړیواله کچه ستر محبوبیت ترلاسه کړ.د اسلامي شریعت نافذول، خلکو ته د خدماتو وړاندې کول، د عدالت تامین او روان سرتاسري امنیت هغه څه دي، چې د اسلامي امارت د محبوبیت په ډېرښت کې یې لویه مرسته کړې.د تېرو دریو کالو دې هڅو او زیار ته په کتو خلک د اسلامي امارت پر وړاندې لا نور هیله مند او باورمند شوي دي.نړۍ هم د اسلامي امارت دغو هڅو او لاسته راوړنو ته د حیرانتیا په سترګه ګوري. نړیوال د اسلامي امارت د پرمختګونو او د هېواد په بېلابېلو برخو کې د بدلونونو په اړه مثبتې ارزونې کوي.په ټوله کې اسلامي امارت درې کلن مزل د هېواد په تاریخ کې یوه مهمه دوره ده، چې په بېلابېلو برخو کې یې ستر بدلونونه رامنځته کړي او راتلونکي کې هم افغان ولسونه د دغه ډول مثبتو بدلونونو لپاره اسلامي امارت ته لاس په دعا دي.
